Si 'e vvote.... di Gioacchino Ruocco

 

 

Si ‘e vvote …..

 

Si ‘e vvote

me metto c’’o penziero

a turnà arreto,

comme a nu furastiero

ca c’è venuto

pe na cammenata,

na veppete ‘e acqua d’’a Maronna

e l’onna d’’e ricorde

me porta ‘nterr’’a rena

pe turnà arreto a mmare

cchiù calmo ‘e comme stevo

‘o core mio,

ca nun le pare overo,

passa p’’e strate

comme a na cumeta

p’arrefrescà  ‘e ricorde

comme a na brezza ‘e mare

sempe cchiù sincero

‘e dicere chello ca penza

ca nu paraviso

comme a chisto

addò s’è visto maie,

ca te dà pace

pure si è cammurrista

e te ne porta

a ‘mbruscinarte tuorne tuorne

comme facive a iere

cu penziere

ca strure mentre campa

o haie già campato

comme aiere

ca ‘e ville ancora attuorno

parlan ‘e chello ch’è rimasto

‘e chello ch’ereno.

 

Mistere ‘un ce ne stanno

nuie simmo ancora

chille ‘e quanno

‘e primm’acque

ascetteno ȃ sotto terra

o dint’’o late ‘e na muntagna

a rrefriscà chille

ca ‘a ccà passaveno

e chelli ca ce campaveno

senza d’’o pretennere.

 

Si ‘ e vvote torno arreto,

voglio essere sincero,

me chiagno ‘o juorno

ca l’aggio lassato,

ca quanno ce ritorno,

comme aiere,

chello ch’è stato è stato,

me guardo attuorno

‘e trovo chillo c’ancora me dice:

- Addo si stato ?

ca me si mancato!

Te siente bbuono ?

E allora futtetenno…

Chella s’è già spusata ….!

E’ mmuorto Francischiello

Penzo ca nun t’o ‘rricurdave…

E’ visto ‘o lungomare

c’hanno fatto ?

E’ assaie cchiù bello,

assaje… cchiù bello ‘e primma…

Pigliammece ‘o ccafè

ch’è già pavato…

Chi ‘o sa

quanno te vede Catellino…

che ddice

ca ogne tanto s’arricorda ‘e te…

e vò sapè che faie

quase ogne matino

all’ora d’’o cafè…

Chillo ch’è già pavato…?

Mannaggia chi t’è nnato!

Aniè.., Si sempe ‘o stesso…

 

Gioacchino Ruocco

15.12.2020  Ostia Lido h 04/07

Fontana grande - attribuito a Giacinto Gigante