Ogge nun tengo voglia

 

Ogge nun tengo voglia

 

Ogge nun tengo voglia

manco ‘e murì

o ‘e jì p’’a casa

comme ‘o llunnerì

pe dà nu sguardo attuorno,

pe capì

si ‘a casa

necessita ‘e qualcosa,

si ‘e ppiante songo secche

ca stanotte

na vota ha fatto cavero

e ‘int’’a matinna friddo

ca pure dint’’o lietto

l’aggio ‘ntiso

tanto ca stasera

mettimmo na cuperta

cchiù pesante ‘ncopp’o lietto

ca ‘e vvote ‘e sante

nun ce ‘a fanno

cu nuie ca  simmo tante.

a ce stà attiento.

Meglio nun ‘e dà troppi penziere

mentre ‘o lumino

nun m’’o scordo maie.

Quanno se cunzuma

n’appiccio uno nuovo

e nun è che ‘nzumo,

io nun ‘e faccio fesse.

Io tengo l’interesse ‘e campà

ancora n’atu ppoco

fino a ca riesco

appiccià ‘o fuoco,

‘e fa na sarzulella

pe duie file ‘e pasta,

fino a ca muglierema me dorme

ancora affianco

e io  stanco

ma muorto ‘e suonno ‘a guardo

p’essere felice.

 

Primme eremo amice

e mò campammo

‘a tant’anne assieme

ca senza ‘e essa

nun ce ‘a facevo a stà,

ca mò quanno m’addormo

io ma sonno

e me sonno sempe

ca me sta cantanno

a nonna nonna

o ‘a ninna nanna

pe me tenè cuieto…

pe me fà durmi

pesante comme ‘e prete

ca nun ‘a lascio stà

manco ‘int’’o suonno

tanto ca ne songo

nnammurato.

 

Gioacchino Ruocco

Ostia Lido 29.11.2020