Nu poco, sicuro, m’è vuluto bene,

 

Nu poco, sicuro,

m’è vuluto bene,

forse nu poco pur’io

ca m’arriordo ‘e ppene

ca m’è dato,

ca ‘e vvote

me sentevo scunzulato

‘e nun t’averte

almeno comme amica,

na chiammate

pe fà doie chiacchiere

pe sapè che faie

e comme passe ‘o tiempo

ca mò sicuro chi sa quanto ne tiene.

Si ancora pienze ‘’o tiempo ch’è passato

si nun me pienze maie,

e si cu mme ancora si arraggiata.

 

Dumanne ‘e te ‘e vvote

a chi te sape,

ma è ggente strane

ca guarde e nun risponne.

Forse pe s’annasconne

pe nun sentirse ncuollo

‘o maletiempo

ch’è ormaie passato…

 

Invece ancora te ricordo.

ca io nun s’’o tipo ca me scordo

nu piezzo ‘e vita mia,

‘o tiempo c’affianco simme state

ca ogne tanto torno e me fa bbene

ca pure ‘e ppene

songo sentimente.

 

 

Gioacchino Ruocco

10.11.2020          Ostia Lido