Si nun tiene pacienza …

Si nun tiene pacienza

vaie a ffunno

e ‘o munno se ne fotte

quanno chiagne.

Ogge, dimane

e pure a capuranno

‘a vita tena regule

già scritte

e va deritta

sulo p’’a via soia.

Che noia ‘e vvote

quanno tu vulisse

nu poco ‘e pace

e nun te faie capace

‘e na disgrazia.

ca proprio mo

c'avive chiesto ‘a grazia

succere ca

va tutto cose stuorto

e s’accummencia

n’ata vota ‘a capo

ringrazianno ca ancora

nun si muorto.

E propio aiere

ca jette a cammenà,

c’’o medico

m’ha ditto c’aggia fà,

uno m’ha miso sotto

e m’ha acciaccato.

Cchiù furtunato ‘e me

addo ‘o truovo ?

Ormai arrugginito

comme a cchiuvo

ca chisto comme a nuovo

m’ha pavato.

Me tocca sta c’’o pede

dint’’o gesso

pe trenta juorno

e si va tutto bbuono,

nu mese ‘e terapia,

ato che fesso.

Me tocca

pure qualche avemmaria.

pecchè ‘a Maronna

sicuro m’ha salvato
e tengo 'o paraviso
assicurato.

Gioacchino Ruocco

Ostia Lido             21/04/2013

Inserita nella raccolta “Tipi… ma quanti tipi”