I’ te perdette…

I’ te perdette quanno ‘a primavera

cantaieno ll’auciello n’ata vota.

Tu me guardave ma passie cchiù ‘e n’ora

primma ca me diciste: - Vaco fore.

Meglio ca ce lassamme mò ca parto,

pecchè quanno se parte

nun saie 'a vita che te porta a fà.

Po’ nascere qualche necessità

e 'a vvote ’a vita nosta po’ cagnà.

E io ca nun so stata

maie na capa allerta:

- Facimme comme vuò,

te rispunnette.

T’accumpagnaie,

nun me tiraie arreto.

Saglienno ncopp’’o treno salutaste

danneme appena ‘a mano,

justo justo.

E nun sentette ‘e te cchiù na parola.

Appena nu biglietto me screviste:

- I t’evo perzo tantu tiempo fa.

Stanno luntano me sento cchiù felice.

Me so’ fatte ll’amice pure ccà.

Penzavo a primavera…

Nun me n’ero accorto

fino a ca ll’auciello nun cantaieno

ca tu nun ire cchiù chillo ca ire.

A poco a poco pur’io me so’ scetata

e nzieme all’auciello sto cantanno

canzone nove

raccuntanno a ll’ate

‘a vita che te fà

e comme va

ca n’ammore fernesce e se ne va.

Gioacchino Ruocco

Ostia Lido     21/04/2013

Inserita nella raccolta “Traduzioni dal greco”