Si ll’acquà sta vullenno

Si ll’acquà sta vullenno

mena ‘a pasta

chella c’a ce vò

sulo pe tutt’e dduie.

A me basteno quatte file

a te dimeno

ca quanno hammo mangiato

stammo cchiù cuiete.

Basteno poco

si songo’ vermicielle.

‘E bucatine

me vanno pure bbuone

ma nun me piace ‘e sentere

‘o sisco ch’isse fanno.

 ‘A pasta corta

me va bbona ‘o stesso

c’’o zuco ‘e pummarole

appena covete

o ‘e piennelo

cu n’aglietiello frisco

ca te ‘nzapora ll’aria

cchiù d’’a pasta.

Doppo doie furchettate

ca m’avasteno

me sento sazio

e no ‘o muorte ‘e famme

ca ogne vota pare

quanno m’accosta a tavula.

Vide ca ll’acqua volle

m’’o dice ‘a voce

‘e chistu caccaviello

ca so tant’anne

ca sta a casa nosta

Me pare ca le piace

pure a isso

ll’acqua ca volle

e và facenno ‘mbolle

ca canteno felice.

Si faie ‘o zuco ‘e cchiù

astipeno nu poco

facimmo ‘o tianiello

pe cchiù tarde

si ancora avimmo famme

‘int’a nuttata.

Gioacchino Ruocco   Ostia Lido  27.05. 2020