‘A jattella…

‘Ncopp’a nu terrazzino morta ‘e suonno

stà na jattella ca vulesse ascì

pe se ne j’ per vicule vicine

pe j’ a vedé ‘o munno comme è fatto

e si ce stanno ancora ll’ati gatte

e ‘a mamma soia c’’a mettette a munno.

Nu sorece che d’è nun l’ha maie visto

e ‘un s’arricorde cchiù che vo’ dì nu "friste"

mentre ‘o piattino nun resta maie vacante

si ‘e pprea o nun ‘e preia tutte ‘e sante.

ca vonno bbene pure a tutt’‘e gatte

mentre ‘a patrona arape na buatta.

Chesta signora l’avette pe regalo

'a na guagliona ca cumbinava guaie

e s’’a faceve ch’’e gatte sulamente

ca comme a esse ‘nzapunoneno ‘a ggente

strusciannese  mò a chisto e mò a chill’ate

e suspiranno p’accuncià ‘a jurnata.

Penzava e ce penzava tutt’’e juorno,

ma sempe ‘o terrazzino ll’attuccava

fino a ca nu juorno suspiranno

nun le venette ‘a chiagnere e capette

c’’a vita ca faceva nun le piaceva cchiù.

Nun saccio comme, pigliaje e se ne jette.

Ma si ‘’a guardo penzo ca fuie nu suonno

ca se facette quanno ‘o mese ‘e marzo

passaie nu jatto ca facetto ‘o pazzo

comme a nuvena ‘e chi va dd’’a Maronna

e se scete matina e muorto ‘e suonno

dice ‘o rusario  pe nun j’ maie a funno.

St’appassuliata dint’a n’angulillo

e nun se move comme si fosse ‘e preta.

Nun tene maie nisciuno c’’a va arreta,

nun tene maie nu sorece pe ‘nnanze.

Fa ‘a signurine ma no pe scelta soia,

dint’a sta casa ce sta 'e casa 'a noia.

Ostia lido      01/11/2012      h 9.30

Autore: Gioacchino Ruocco

Inserita nella raccolta “ TIPI “

in via di pubblicazione in questo blog