Gioacchino Ruocco
‘E primma matina
Stammatina
Stammatina ‘o mare
è comme a chillo ‘e na cartolina
e ll’aria chiena ‘e sole
ca nun ce stanno parole
pe t’’o raccuntà.
Scetate e ajesce
ma si te rencresce
‘e lascià ‘o lietto
so’ pronte mille dispiette
d’’a parte mia
ca te stongo aspettanno
‘nmiez’’a sta via
già ‘a n’anno.
Curre
c’’o sanghe se scete
e dint’’e vene
siente ‘a freve ‘e campà.
Nuie simmo ancora guagliune
pure si ‘qualcuno
dice ‘o contrario.
Ma che te ne ‘mporta !
Arape sta porta
e viene cu me
primmo c’’o tiempo se cagna
e addeventa na lagna
ca male po’ fà.
Si viene t’aspetto
sto sott’’o purtone
si no fra poco
me siente ‘e bussà.
Ostia Lido - 30 aprile 2009 - Ore 08,30
Si tiempo me ne resta
Si tiempo me ne resta
te voglio fa na festa
c’’a gente d’’o quartiere
addà dicere:
- Ma ch’è succieso ?
Ma a te ca si na ‘mpesa
nun te ne ‘mporta niente.
‘A ggente, ma ch’è ‘a gente.
Pe te ce sto sul’io,
o ce sta pure n’ato ?.
‘A gelosia è nu sfizio
ca nun te faie mancà,
‘e chiacchiere
sultanto pe parlà.
‘O riesto è cosa seria
comm’’a miseria
‘e chi p’‘a stessa via
fenesce ‘mbracci’ a ll’angele
o perde ‘a fantasia.
Si tiempo me ne resta
te voglio dì ‘o cunto
‘e chi nun parte e resta
pe mantenè ‘o punto.
Si tiempo me ne resta
te voglio accuntentà
almeno pe na vota
senza sta a ssindacà
chello ca faie o dice
pecchè
so’ ll’ommo chiù felice
assieme a te.
Pe te ce sto sul’io,
o ce sta pure n’ato ?
Ostia Lido, 30 aprile ore 13.30
Nmiez’’o mare
‘A cartulina ca t’aggio scritto
‘a quase nu mese
sta ancora aspettanno c’’a mbuca.
‘O saccio ca si me ‘mpiccio
‘ o core s’appiccio cchiù forte.
‘O miccio ‘e tutta sta storia
‘e chillu sguardo,
‘e cchillu suspiro
ca t’é fatto scappà.
‘O sapivo ca nun l’ive fa!
Me canusce
e ’o saie ‘a quann’ire guagliona
ca pe te aggio perzo
‘o suonno e ‘a pazienza
ca so’ juto addò ogne ragione
nun tene chiù ’o tiempo ‘e penzà !
Ma mò che vuo ‘a me ?
Ma pecchè quanno m’è visto
m’è guardato cull’uocchie sperute ?
Pe me quanno n’ammore è fenuto
nun c’è niente pe farlo turnà.
E si quanno ce simme ‘ncuntrate
t’aggia stretta ‘a mano cu forza
tu è capito na cosa pe n’ata
pecchè cu forza so’ abituato a campà.
E io cu forza te dico sincero
ca nun è comm’a ll’urdema sera
primm’’e partì.
Si te penzo e ce penzo,
’a vita è cagnata
pecchè ’a vita c’aggio campata
me l’aggio sudata
juorno pe juorno
e nun vulesse mettere scuorno
ne a me ne a te.
Mò so n’ommo tranquillo,
so n’ommo ‘e na sola parola.
E si ‘a nostalgia me piglia
m’’a faccio passà.
‘E canzone so tante.
e ‘a chitarre già ‘e sape.
N’accordo e me scordo
‘e penziere cchiù amare:
tu nun ‘o saie,
ma ‘nmiez’’o mare
c’è poco ‘a suffrì
si no se va sotto
e nun tuorne cchiù a galla.
Ostia Lido – 30 aprile 2009 ore 16.30
Gelusia
Me sto perdenno
appriesso a nu pensiero
ca fin’a iere nun penzavo ‘e avè.
E t’’o dico cu n’animo sincero
ca nun so stato maie geluso ‘e te.
Pe me tu si na femmena
comme i’ songo n’ommo
diverse pe fa ‘e stu munno
nu triato overo.
Tu tiene nu pensiero
e io ne tengo n’ato
pe chesto me songo ‘nnammurato ‘e te.
So’ fatto ‘e na manera
e voglio sta cu te
senza male penziere.
Te voglio guardà ‘nfaccia
sicuro ‘e guardà sempe ‘a stessa femmena
ca tutt’’e juorne
trovo affianc’a me.
Ma ogge a che pienze
ca nun m’è ditto ancora na parola ?
Si ‘ncielo ce sta ‘o sole,
io sento sule tronele ?
Si nun ‘a penzo sempe comme a te
nun te sto danno ‘o sfratto.
Te voglio bbene sempe
ma nun me fa penzà
a chello ca nun voglio.
‘O mare è chino ‘e scoglie
pur’io pozzo affunnà.
Ostia L. 2 maggio 2009 ore 7.30
E’ primavera…
‘O friddo ‘e sti juorne
m’è miso ‘ncuollo na malinconia
ca nun me vo lassà.
M’astregno a te
ma nun se scarfa st’anema
ca chiù nun trova
nu penziere doce.
Comme aggio fà
si me sento ‘ncroce
e ‘a voce toia
è nu pensiero
ca nun me fa murì ?
Me giro dint’’o lietto
e nun te trovo,
te chiammo
ma nun me stai’ a sentì.
‘O saccio songo ‘e nove
e già te si sesuta
ca tiene tante ‘a fà.
Comm’è stu fatto,
sta freve ‘a do è venuta ?
Che brutto tìempo!
Me pare ca mò more
eppure ‘o core sbatte,
sta ‘mpazzenno.
‘O ssento
ca nu’ stongo murenno.
Ma nun se po’ suffrì
‘e sta manera
aspettanno ca na sera
tutto po’ cagnà.
Tu si ‘a felicità
ca m’è rimasta,
ma io che so’ pe te
si nun t’avasto ?
Mò nun è tiempo
ch’’e fronne hanno cadè,
è primmavera
e io me fido ‘e te.
‘O senzo d’’e parole
Me songo perzo
‘nmiez’’e chiacchiere
centenare ‘e vote
pecchè ‘e parole tenene
tanta sfumatura
e ognuno ‘a po’ cuntà
comme le pare
‘a verità ca tene dint’’o core.
Comm’io e te
ca sempe ‘e amore parlammo
‘a quanno stammo ‘nziemo.
Ma tu dice na cosa e io ne dico n’ata
ca pare ‘a stessa
pure si m’è lassato
appeno ll’atu juorno.
E nun t’’o dico
p’accummincia daccapo
‘a stessa vernia
‘a stessa litania.
Stevemo ‘nziemo,
ma ognuno pe na via
e ognuno mò
pe fatte proprie.
Che t’aggia dicere ?
Può fa chello ca vuò!
I’ stammatina me ne so juto a mmare
e aggio piscato nu cenceniello appena,
tu forse truove ‘e meglio.
Chello ch’è stato è stato
e cu ll’estate ca vene
chi sa ‘a gente
ca te vene attuorno
e io’ quantu frisco
ca me sto gudenne
riflettenne
su ‘e parole ca dice
ca quanno nun me fanno felice
pene me danno.
Ostia Lido 7 maggio 2009 ore 10.00
Si tu vuò fa….
Si tu vuo fà
a chi cchiù grossa‘a dice
allora se po’ fa.
Ma si ‘o faie
pe metterte sultanto a coppa
allora lassa stà
ca già me so stancato
‘e pazzià.
Quanno me sceto
nun aggia sta a penzà
si chello ca te dico
è poco o tante,
si è quanto
o assie cchiù poco
‘e chello ca me dice tu,
si te faccio felice
oppure no.
I’ voglio pazzià,
ma no’ c’’o fuoco
I’ voglio sta cu te,
ma no a f’’a corza
a chi arriva primmo.
Si nun scapizza,
si nuie nun ce capimmo,
che vuò fa ?
Vulisse cuntinuà
a fà stu juoco ?
M’allora nun staie bbona,
tu vuò pazzià c’’o fuoco !
Ostia lido 13/05/2009 ore 07.20
A quantu tiempo…
‘A quantu tiempo ca ce canuscimmo !
Eremo guagliuncielle
‘ncopp’’e bbanche d’’a scola
quanno ‘e parole nun serveveno a niente,
ma era ‘a simpatia a ce piglià.
Eremo duie friarielle,
diverse ‘a ll’ate
ca facevano remmore sulamente,
nuie, invece, stevemo appartate
dint’a nu munno
c’apparteve a nuie sultante.
T’avevo perzo, pecchè criscenno
e cagnanno scola,
capette c’’a vita mia era na lotta
e ‘a toia nu sunno ca nun putevo fà.
E te guardavo speruto ‘nmiez’’a via
quanno passave sciantosa ‘nziem’a ll’ate
quanno guardave, ma no d’’a parte mia
ca te venevo appriesso ‘nnammurato.
Ma po’ nu juorno,
nun saccio comme fuie,
qualcuno te facette ‘o nomme mio
e ce ‘ncuntraiemo
comme a chi nun s’è maie scurdate.
E mò ? E mò é n’appiche appriesso a n’ata.
Che dicene ll’amice ?
E chi ‘e benedice st’appicciche ?
E chi te sta dicenno ‘e me lassà ?
Raccuntamelle prime ca sta storia
avesse cagnà ‘a vita ‘e tutt’’e duie,
almeno si te ‘ncontro
saccio ‘e che panne vieste.
Chi fa festa, dimane, nun ‘o saccio,
ma te voglio guardà deritto ‘nfaccia
senza rancore, senza malinconia
e alluntanarme tranquillo pe sta via
ca me porte fore
senza cchiù strille
pe putè campà.
Ostia Lido 13/05/2009 ore 22.00
Ma che vulisse dicere
S’io te voglio bbene
e tu me ne vuo’ ‘e chiù
m’avesse convenì
chello ca dice tu.
Ma chistu fatto ‘e dicere
ca faie chiù assaie ‘e me
me fa suffrì nu poco,
pure si ‘o dice tu.
Ma che vulisse dicere
ca tu si meglio ‘e me ?
Allora parla pe primma
c’’a mette a copp’a te.
Ostia lido 14/05/2009 ore 14.20
Sinceramente
Si nu juorno avesseme fà ‘e cunte
‘e chello ca m’è dato e t’aggio dato
i’ te dicesse chello ch’è stato è stato.
L’ammore po’ feni e si è fenuto
na ragione ce stà sicuramente,
ma che ce pozzo fà si cchiù niente
arreto ce fa turnà.
Aggio sbagliato, nun saccio quanta vota
e tu, me ll’arricuorde ogne mumento,
nun passa juorne ca nun m’’o faie capì.
Pe nu principio o pe delusione
tenesse pur’io ciente ragione,
ma nun l’annote ‘e cose ca nun vanno
si no stesseme a dicere cient’anne,
invece ‘e ce gudè chille mumente
ca stammo a perdere, uno e po’ n’ato,
e ce trovammo ancora nnammurate
cca ce vulimme bene overamente.
Si nu juorno avesseme fa ‘e cunte
io che te conte
c’a modo mio t’aggio vuluto bbene ?
Senza me fa ragione meza vota
mettendo ‘a capa sotto e faticanno
te so’ stato vicino pe tant’anne
cantanno e sfrennesianno ogne mumento.
Si quanno te ne vaie a n’ata parte
lasciame almeno ‘e suonne c’aggia fatte
si avesseme fa ‘e cunte… all’intrasatte.
Ostia Lido, 25/04/2010
Tanto dimane….
Tanto dimane ‘o maletiempo passa
sarraie felice pure senz’’e me.
‘A vita, ‘o ssaie, ca sola nun te lassa,
starraie cu n’ato si nun starraie cu me.
E si m’allaie ‘e faccia passa ‘nnanze.
Si te fa male ancora cagna via.
Si ‘a vita è chesta, allora cosi sia,
forse dimane me ne vaco ‘a ccà.
Si s’è cagnato chistu sentimento
meglio accussì ca dirce na buscia,
guardarte int’a ll’uocchie e suspirà.
Tanto dimane me ne vaco ‘a ccà.
Parto pe nu paese addò nisciuno
me sape, addò pozzo fa bbene all’ate,
addò si do na mano a na perzona
nisciuno haddà penzà chi sa pecchè.
Pecchè t’aggia scurdà pure si m’è fatto
capì l’ammore, m’è fatto adeventà
n’ata perzona, cu na ragione ‘e vita .
Che vonno sapè ll’ate, e a chi ‘o ddico?
‘A quanno te conosco…
‘A quanno te conosco
n’aggi’ acchiappate schiaffe
e seguzzune arraffe
‘a tutte quante.
All’anema d’’e sante
ca ce stanno ‘ngiro!
Forse pecché so’ niro
me tratteno accussì !
No ‘e pelle, ‘e core,
ma quanno facci’ ammore
assieme a te
me passa tutte cose.
Basta na rosa
pe te fa felice,
i’ voglio ca me dice
ca sempe me vuò bbene,
tutt’’e juorne
pure si nu latuorno
songo cierte mumente.
Ma basta ca te sento.
‘A quanno te conosco
tengo na ‘mmiria ‘ncuollo
ca chiù ‘e uno aspetta
‘o juorno ca me muollo.
Ma a me nun me ne ‘mporta
so’ giovane e capace
e a chi m’’e fa girà
le dico: - Schiatte in pace.
‘A quanno te conosco
n’aggi’ atterrata gente.
Nisciuno po’ cchiù niente
‘a quanno sto cu te.
Ostia Lido, 27/06/2009 ore 08,45
‘O saie che c’è di nuovo ?
‘O saie che c’è di nuovo ?
Te voglio tantu bbene
ca pe forze, oj né,
t’aggia cantà.
Stasera si siente
na canzone dint’’o vico,
na voce ‘e notte
comme a chella antica,
é ‘a voce mia
ch’è appena nu sussurro
ma te canta ’o bbene
ca tu nun vuò capì.
Quann’uno è pazza
e nun vò sta a sentì
e na manera o ‘e n’ata
haddà fernì.
E io ca nun m’arrenno
si nun capisco pecché
nun me vuò sentere
Carmè,
vulesse
ca tu me rispunnisse
cu nu signale,
cu na mmasciatella,
cu na palomma
ca sta giranno
‘a quanno te sto appriesso
e nun se dà maie tregua.
Stanotte ‘a freva è tanta,
ma nun avé pietà;
si me capisce affacciate,
nun me fa cchiù aspettà
si no dimane muorte
sule me può guardà .
Ostia Lido 27/06/200
Me ne vogl’j’ a Surriento
Me ne vogl’j’ a Surriento
appena tengo ddoie lire
e me vulesse truvà
na guagliona cu ll’uocchie nire
e senza ‘nfamità.
Sotto all’albero ‘e nu scardino
me voglio arrepusà
c’‘addore d’‘e llimone,
arance e mandarine
ca scetanneme
me pare ‘e stà a sunnà.
Me ne vogl’j’ a Surriento
‘nponte ‘o Capo
pe ragiunà c’’o mare e po’ c’’o viento,
ma pe capì ‘int’’o core che ce tengo,
chi gli’ ‘o fa fa e s’agità
e fà tempeste
quanno ‘nterr’a na marina
l’onne s’addormeno quiete
senza turnà cchiù arrete.
Me ne vogl’j’ a Surriento
pe sentì ‘a voce d’’o viento
quanno passa ‘a na fronne a n’ata
purtanno na ‘mmasciata
‘e chi sa chi
o sbarea ‘nzieme all’arillo
e dint’’e capille
é na mano lligera ca m’accarezza
levanneme ‘a cuollo tanta tristezze
ca m’aggio pigliato.
Me ne vogl’j’ a Surriento
pe nun me scurdà
ch’esisto pur’io
quann’accummience c’’a stessa zampogna,
quann’’o tiempo se ‘ngrogna e si chiove
trovo nu purtone e m’arrepare.
Me ne vaco a Surriento,
ma t’’o ddico ca si vuò venì
basta ca scinne d’’o treno e me truove.
Me ne so juto a Surriento pe t’aspettà
no pe fuì ‘ncap’’o munno, si ‘o vuo’ capì
si ancora me vuò, si ancora te voglio.
Ostia Lido - 25/04/2010
Dalla raccolta TURNANNO ARRETO
Per notizie sull'autore vedi: Ruocco Gioacchino - Biografia
