E’ overo, a marzo chiove....

E’ overo, a marzo chiove

mentre stà ‘o sole ‘ncielo

e’o sole spacca ‘e prete

quanno ll’aria è cuieta.

Ca cchiù ‘e n’auciello

s’arrangia pe campà,

e ‘o friddo ch’è rimasto

te mette ‘a freva ‘ncuollo

ca quanno aiesce

nun saie comme rituorne

ca si vaie luntane

è meglio purtà ‘o ‘mbrello.

Dint’’o ciardino

tienete arreparato.

Si n’auciello canta

nun è ch’e ‘nnammurato.

Pur’isso sta pruvanno

comme se mette ‘o tiempo

pe fa nu volo

fino ‘o ciardino appriesso.

Pecchè, pecchè ‘e tronale

fanne tremmà ‘e mmure.

e ancora c’è bisogno

‘e tanta secatura

pe fa vollere ll’acqua

c’a miezojuorno serve

pe fa nu poco ‘e pasta

c’ ‘o pesto o c’’a cunzerva.

A me cu aglio e uoglio

me ‘mbruoglio tutt’’e juorno

E nun me mette scuorno

quanno t’’o ddico, oj né.

Pecchè a primavera

me vene cchiù appetito

e tu  cchiù sapurita

me faie stravedè

Gioacchino Ruocco 
Ostia Lido     03/05/2012

Inserita nella raccolta "Suspire 'e miezojuorno"
di Gioacchino Ruocco 

I' che jurnata da Suspire 'e miezo juorno di G Ruocco

I’ che jurnata !

I’ che jurnata !

N’aria picciosa

ca se ne porta l'addore

d’’e primme rose

‘a sott’’o naso.

Nu friddo ca s’attacca ‘ncuollo

comme a na freve

‘e primma stagione.

E tu ca vuo’ avè sempe ragione

c’’a primavera

è ‘a cchiù bella stagione.

Forse pecchè te tengo

sempe cchiù astrent’’a me,

forse pecchè

senza tanta parole

facimme ammore

’ncopp’a sti sgoglie

c’ormaie m’ero scurdate.

c’addore ancora mannene,

ca sottovoce conteno

tutte’’e suspire nuoste ?

E che prefume tiene !

‘O bbene quanno è bbene

te piglia e te ne porta

addò vo’ isso,

addò i’ stesso sempe a te vasà.

Sarrà st’aria picciosa

c’addore ‘e fummo e mmore

a metterme ‘int’’o core

chistu pensiero doce.

E ‘o saie ca a mme me coce

quanno nun vuò capì.

Gioacchino Ruocco

01/05/2012           ore 13,30

Inserita nella raccolta "Suspire 'e miezojuorno"

di Gioacchino Ruocco 

I’ m’arricordo ‘e te...

I’ m’arricordo ‘e te…

I’ m’arricordo ‘e te

quann’’o cielo se fa scuro

e me vene na paura

e nun te truvà cchiù.

I' m'arricordo 'e te
quanno vene 'o maletiempo
e nun trovo attuorno niente
pe puterme arreparà

Quanno 'o core resta sulo
senza n'ombre, na parola
e nun trova cchiù arricietto
pe puterse cunzulà.

I m’arricordo ‘e te

quanno torno a casa a sera

e sta strada se fa nera

comme ‘a pece e saie ‘o pecchè.

Quanno torno e nun te trovo,

quann’aspetto e tu nun viene

quann’’o core se ne more

chianu chianu senz’’e te.

Quanno chiammo e nun rispunne

pecchè staie all’atu munno

e ce credo o nun ce credo

nun te pozzo cchiù tuccà.

I’ m’arricorde ‘e te

pecchè ‘o core ca m’è dato

pure si me fa suffrì

tanta juorne m’ha cagnato,

pecchè me fa ‘ntennerì

quanno songo ‘nnammurato,

pecchè me fa scevulì

pe nun fa suffrì a ll’ate,

pecchè tengo na ragione

ca vulesse cagnà ‘e ccose.

I’ m’arricorde ‘e te

quanno soffro e quanno chiagne

e nun cerco maie sparagno,

sulo ‘a forza pe campà

pe dà pace a tutte quante,

muorte ‘e famme ca so sante,

mariuole ca so triste,

chille ca so’cammurriste

sulamente pecchè ‘a sciorta

quanno è nata è nata storta.

I’ m’arricordo ‘e te…,

comme faccio a mò scurdà ?

si m’ha dato proprio tu
chisto sciato pe campà.

Ostia Lido             12/03/2012      ore 21,14

Inserita nella raccolta "Suspire 'e miezojuorno"

di Gioacchino Ruocco 

I' scrivo....

I’ scrivo…

I’ scrivo e facci’ ‘ammore c’’o pensiero.

Accuss’ aiere quanne te vedette

e me venette ‘a vogli’ ‘e te vasà.

Nun ‘o putenne fà

screvette sta poesia

pe te dì ‘o bbene ca te voglio

e ‘a quantu tiempo stongo a te penzà.

Chi me canosce

sape ca so’ sincero

ca stu mumento penzo sulo a te

e si nun fosse overo

aggià cecà

T’’o giuro ‘ncopp’ a chello ch’è cchiù caro,

pe quanto è gruosso ‘o mare fino a ‘nfunno.

Ogne vote ca scrivo

ce sta sempe però

chi vo’ sapè  chì è ‘a femmena ca canto

pe se ne fa nu vanto,

ma io nun apprufitto

ca penzo sule a te.

Sta canzuncella

ca piace a chesta e a chella

parla sultanto ‘e te,

‘e ll’uocchie belle

ca tu tiene ‘nfronte,

‘e sta vucchella

ca nun lasciasse maie.

Tu si’a cchiù bella

e quanno ‘o sole sponte

è fortunato chi te pò guardà.

Ma chi cchiù ‘e me

quanno te tengo astrenta

e cunte ‘a uno a trenta

pe nun te fa lassà ?

E io te vaso sempe cchiù annascuse

e nun ‘o saccio cchiù quante so’ ‘e scuse

c’amma truvà pe ce pute ‘ncuntrà.

Pe chesto ‘o scrivo dint’a stu quaderno

c’’a speranza c’addevente eterno

ca scrivo e faccio ammore c’’o pensiero

pe colpa toia c’ancora vuò pazzià.

Ostia Lido          11/03/2012      ore 17,00

Gioacchino Ruocco


Inserita nella raccolta "Suspire 'e miezojuorno"
di Gioacchino Ruocco