ALL' INFERNO 1 di Pasquale Ruocco

PASQUALE    RUOCCO

ALL' INFERNO

Poeti: Pasquale Ruocco

Pasquale Ruocco e Raffaele Chiurazzi



Pasquale Ruocco



Raffaele Chiurazzi e Pasquale Ruocco

Vita e opere

POESIE

FEMMENE  E  ROSE

 

Femmene belle d”e canzone antiche,

ve sento n’ata vota suspirà

mentre spontano ‘e stelle e dint”e viche

‘e cuncertine tornano a cantà.

 

So’ fatte ‘e sciure, lacreme e suspire

chesti canzone ‘e n’ata gioventù:

Carulina, cu ll’uocchie nire nire,

fra cielo e mare nun s’affaccia cchiù.

 

Erano ‘e rrose ‘e ‘nu ciardino allero

‘sti ‘nnammurate ‘e tantu tiempo fa:

e mo pecché Carmela ‘e San Sivero

nun passa cchiù p”e vvie d”a Sanità?

 

‘E manduline tremmano scuntente,

‘a luna saglie lenta: e i’ penzo a te,

palomma malinconica e lucente,

Maria, ca t’addurmive ‘mbraccia a me.

 

Tutto chello ca ride ncopp”o munno

scenne ‘int’a ll’ombra e nun po’ cchiù turnà…

Dimme, addò vanno ‘e ffronne ‘int’a ll’autunno,

dimme, addò vanno ‘e nuvole d’està!

 

Pasquale Ruocco

 

 

 

Da: - Poesie Napoletane -

- Morano Editore - Settembre 1972

Nun è overo

No, nun ‘e state a sentere ‘e canzone!
Chistu mare è celeste, 'o cielo è d'oro,
ma stu paese nun è sempe allero.

Nun sponta sempe ‘a luna a Marechiaro
e nun se canta e se fa sempe amore;
cheste so’ fantasie pe' furastiere.

 
Si vui vulite bene a stu' paese,
fermateve nu' poco dint’’ e viche,
guardate dint'’e vasc e fore 'e chiese.

Venite, assieme a me, p’’e strate antiche,
invece ‘e cammenà vicino 'o mare,
parlate cu chi soffre e chi fatica.

Quanta malincunia p’’e case scure
addò nun trase st aria 'e primavera!
Guardate quanta sante attuorno 'e mura!

Sta gente poverella crede a Dio,
patisce rassegnata e pare allera:
e chi è cecato canta "O sole mio".

N'hanno chiagnute lacreme ll'artiste:
e quante ne so' muorte int'o spitale!
Stu paese d'o sole comme è triste!

Io veco comm’ a n'ombra a ogne puntone
e penzo 'a gente ca lle manc 'o ppane…
Quanta buscie ca' diceno 'e canzone.

Pasquale Ruocco

Dalla raccolta  “Sole d’autunno”