Nu cane e ‘nu guaglione…

Nu cane e ‘nu guaglione…

Nu cane e ‘nu guaglione

nun è na cosa nova pe sti tiempe.

Uno cu ‘a ragione

e n’atu cu ll’uosomo

ca fanno  questione tutt’’e vvote

ca n’aveno bisogno.

Uno ca sonno

e ll’ato ca s’addorme

stanco tutt’’e  dduie

ognuno pe nu modo.

Se guardeno sperute

pe capirse

chi ‘e tutt’e dduie

sta facenno bbuone,

ma chi ave ragione

nun s’’a piglia

e chi ave tuorto

nun guarde maie stuorto

a chi s’’o smiccia

e fanno tarde assieme.

Chell’ata  sera

se perdettere ‘e vista

pecchè nu cammurrista

‘e secutava

nu passo cchiù a nnanze

ce steve qualcheduno c’apettava

p’acchiappà. Fuietteno

comme a n’accordo pigliato

uno a na parte

pe dint’a nu purtone spuntatore

e n’atu ‘o vico appriesso.

Cchiù tarde se truvaieno

addò facevano notte

tutt’’e sere

ma cu na faccia nera

uno già ‘spettava

a ll’ato c’arrevaie

n’ora cchiù tarda

c’’a lengua ‘a fora

e nu cartoccio mmane.

‘O cane se scurdaie ch’era nu cane

e le zumpaie ‘ncuollo

tanto p’’a cuntentezza

ca Peppe si squagliaie p’’a priezza

e s’assettaie

pe nun cadè pe terra.

Ormaie ‘a vita pe lloro era na guerra

deveno fastidio a tutte quante.

Era meglio cagna a pustazione

truvarse priesti n’ata situazione.

Uno parlava e ll’ato gnaulava

comma  a na jatta

quanno nun acchiappa.

Pigliaieno a sacchetta

e doie pulpette  a nu casadduoglio

ch’’e lasciava fore a chi ‘e vuleva

e chianu chianu guardannese attuorno

se ne jettere fino a Margellina

pe se scetà dimane

c’’o sole ‘nfronte,

vicino ‘o mare

comme ‘e marenare

c’’a torneno

cu ‘ rezza sempe chiena

comme a na femmena prena

e p’allerezza stanno cantà

lascianno piscie attuorno

a chi s’’e mangià

e vase ‘e mmane

‘e chi ‘e va a piscà.

Dimane n’ata vita s’appripara

senza sufferenze e privazione.

Basta penzà c’’a spine nun so bbone

e fa nu poco cchiù attenzione.

‘A sera sott’’e varche pe durmi

si chiove o tira viento

si no  ‘o cielo cu ‘e stelle

ca pareno d’argiento e regneno ‘o core

‘e tanta sentimente ca nun te vene voglia

cchiù ‘e durmi si ll’uocchie nun se chiureno a pe lloro.

Gioacchino Ruocco  26.07.2020 Ostia Lido