Pure ‘nterra Surriento ‘o viento è triste....

 

Pure ‘nterra Surriento

‘o viento è triste,

‘e vvote cammurriste,

‘e vvote pazziariello

quanno cerca

‘e t’aizà ‘a vunnella

pe me fa vede ‘o riesto

‘e na bella guagliona

senz’aspettà ‘a stagione.

 

Torna a Surriento

canta na canzone,

ma che ce torno a fà

si ‘a stagione ‘e ogge

nun è comme a chella ‘e na vota,

‘e quann’ero guaglione,

‘e quanno me diste nu vaso

pecchè avevo ragione

e tu diceve  sempe ‘o cuntrario

pe te fa vasà

ch’era ‘a pazzia nosta.

 

Che faccia tosta tenevemo,

che cape toste

ca nun se rumpeveno maie

e sempe chiene

d’’e stesse penziere.

 

S’io currevo nnante

tu me venive appriesso

e s’ire tu a correre

io facevo ‘o stesso

comme ‘o viento

ca scenneva d’’e cuolle

ca cavero comm’era

ce faceva muolle muolle

e ce jettavemo a mmare

addò ll’acqua ce steva

e ce aspettava

‘a quann’eremo guagliune.

 

Che tiempe ereno chille.

Io te sceppave ‘e capille

e tu me vasave.

Io te currevo appriesso

e quanno t’acchiappavo

te salavo a tuute parte.

Eremo guagliune

ma già l’ammore

tanno pazziava

senza penzà ‘o riesto.

 

A mmare stevemo annure

senza nu vestito

senza na vesta

e io te vedevo comme ire

senza currive, senza malizie

cu tutte quanto ‘o riesto.

Era nu sfizio ‘a vita

e nun ce credo ancora.

‘E tiempe so’ cagnate.

Ogge se more

cadenno dint’’a casa,

‘a nu pere ‘e cerase

o pe na sbutecata ‘e pere,

‘e vvote quanno aiesce

‘e vvote quanne trase

comme a n’ombra

ca me dà nu vaso e se ne fuie.

Ogge chesto simme nuie

‘nterra Surriento

senza cagnà na virgula

e manco ‘e sentimente.

 

Ostia lido        21.08.2020 h 07,30