‘E vvoce - di Pasquale Ruocco,

Simmo duie core ca se vonno bene,

redimmo e pazziammo l’ore sane:

‘e vote, io dongo a voce ‘e l’amarene,

tu rispunne cu’ ‘a voce d’ ‘e truiane.

So’ belle comm’ ‘e vierze ‘e ‘na canzone

‘sti voce ‘e fruttaiuole e parulane,

so’ ‘e mutive d’ ‘o tiempo e d’ ‘a staggione,

‘o calannario d’ ‘e napulitane.

Cantammo assieme e addora ‘st’aria fresca

‘e frutte e sciure: e l’anema se ‘nfrasca…

I’ dongo ‘a voce d’ ‘a catalanesca

e tu dai chella d’ ‘e limone ‘e Pasca.