Pure si cagno via.

Quanno purtaieno a patemo

luntano, a prigiunia

restaie a case ‘e nonnemo

cu mammema e cu ‘e zie,

na sora piccerella

e n’ato appena nato.

Nun m’accurgette manco

ca nun ce steve pateme

tant’era ‘a ggente attuorno

tra estaneie e parentela

ch’’e juorne me passavano

pazzianno  fino a sera.

‘A guerra ancora se senteva,

pecché chi se ne jeva 

faceva pulezia

pure si chi arrivava

purtave ‘o bbene ‘e Ddio

pe chi le manca tutto.

Ma sempe guerra era,

a essere sincero,

pe nuie ca muorte ‘e famme

ascevemo distrutte

cu ‘e ccase sgarrupate

e ognuna cu nu lutto

Senza fatiche e frate,

pariente e canuscente

luntano chi sa addò

‘a prigiunia ‘o ‘a guera.

o ancora combattente,

scurdate o all’atu munno.

E vvote me sembrava

ca nun ce steve funno

quanno a pulisse attuorno

faceva tremmà ‘o munno

e qualche spara spara

ancora ce scappava.

Nun era tiempo ‘e ggioie

ma ‘e vvote dint’’o core

sentevo n’aria nova

quanno sbatteva ‘o mare

o ll’evere addurava

e me sunnava ‘e correre

felice p’’a campagna

cu ‘e piede dint’’o lagno,

n’arrampecata ‘e n’albero

pe cogliera na fica,

o na percoca

appena sapurita.

Sentevo dint’’a llaria

nu prufuno  c’’o core

me faceva suspirà.

E assaporavo cose

ca sule po’ ‘e parole

m’hanno saputo dà.

Nu senso ‘e gioia

comme a na poesia

ca ogge ancora regna

tutta sta vita mia,

sta vita can un cagna

pure si cagno via.

Gioacchino Ruocco

Ostia lido        12/03/2013

Inserita nella raccolta "Traduzioni dal greco"

G. Ruocco - Dal mio terrazzo - Acquarello