Forse quanno ritorne austo…

P’’o lungomare ‘o sole

m’adduceva ‘a vita

e i’ te venevo appriesso suspiranno

ca quanno me guardave

n’atu tanto i’ me sentevo

pe ll’uocchie

ca redeveno pe mme.

‘A sera dint’a villa

n’aria fresca

scenneva d’’o Faito

e friccecava ‘a pella

ca ce vuleva pe fforza ‘a giacchettelle

o nu maglione

mise ‘copp’’e spalle.

Era nu via vaie

‘e giuvene e parole.

Chi te veneve appriesso

teneva voglia

‘e sta sempe cu tte.

E chella voglia venette pure a mme

senza capì pecchè.

‘Nzieme cu ll’ate

accumminciaie a fà

pur’io ‘o nnammurate

‘e vvote fino a ttarde

‘e vvote pe qualcora,

fino a che na porola

rumpette l’incantesimo

e accummiaieme ascì

na vota pe na cosa

e n’ata pe parlà,

‘e vvote pe te dicere qualcosa

‘e vvote pe t’accumpagnà.

Pe nu mutivo o n’ato

facevo comme fosse

‘o nnammurato tuio

e ogne tanto te pigliavo a mano.

e tu… tu m’astrignive

e m’’a facive comme è cucente ‘o sole.

P’’o lungomare

aggio passato ‘a vita

e ancora ce ritorne c’’o penziero.

Me pare aiere

ma nu suspire tuio

me scete

e sto a gurdà cu ll’uocchie apierto

a stessa guaglincella ca tu ire

cu ll’uocchie nire

e cu nu core tanto.

T’aggio sunnato

o me s’è perza ‘a strada

sotto a stu sole

ca me chiude ll’uocchie

e sti denocchie

ca nun stanno all’erta.

E vvote che te fa ‘a fantasia !

Te fa passà pe vere

cose ca t’è sunnata.

E’ overo,

‘e te i m’ero nnammurato

ma po’ comm’è fernuta

‘un m’arricordo.

Ce sto penzanno,

ma manco cu soldo

tornone ‘e penziere

‘o tiempo justo.

Forse quanno ritorne austo

i’ m’arricordo ‘e te.

Gioacchino Ruocco

Ostia Lido   15/03/2013

Inserita nella raccolta “Traduzioni dal greco”