Dint’a n’ombra cuieta

Dint’a n’ombra cuieta

Te cerco, ma nun saccio addò staie ?

Addò vaie pe nun darme fastidio

quanno dint’’a cuntrora

me vene nu poco ‘e cechia

ca quanno m’addormo

addevento na preta

me pare ca moro

tanto ca resto cuieto

c’’o respiro m’’o scordo ?

Quanno me sceto

e me torno ‘o ricordo
‘o saccio già

ca forse fra n’ora,

fra n’anno rituorno.

Si m’’o cunto

me piglio n’appunto

ma si ‘o sguardo ca tiene

nun me cunviene

me giro int’’o lietto

d’’a parta toia

e aspetto nu bello dispietto

a pietto a pietto

quanno te gire e me guarde.

Cchiù tarde o forse dimane.

Dint’a st’ombra cuieta e sta casa

succedeno cose

ca nun mm’’e penzavo.

‘E vvote ‘int’a nniente

s’acconcia ‘a jurnata

e turnammo guagliune

comme a na vota.

Na vota, ddoje vote, tre vvote…

Ce steve na vota

na chiorma ‘e guagliune,

ma tu venive e pazziave cu me

pecchè ll’ate, nisciuno

era pe te.

Ostia Lido     05.05.019