Voglio murì

Addolorata - Carmine Lantriceni - Avigliano

I’ nun ce ‘a faccio cchiù voglio murì!

Ma tu ‘o ssaie che me staie a dì ?

Pure Gesù tremmaie ‘nnanze a morte

sapenno ‘a sofferenza c’’o spettavo

saglienno ‘ncopp’a croce o juorno doppo.

Ero nu dio, ma malepateva

sulo ‘o penziero d’’a sofferenza doppia

ca l’aspettava per farce nu piacere.

Chiammaie attuorno a isso a gente soia

pe nun se sentì sulo ‘nnanze ‘a porta

‘e nu munno ca isso canusceva

ca ppure le faceva na paura

comme a nuie piccerille l’ommo niro

ca nun è visto maie ma ce crire.

Senza sapè si è overo oppure no

te fa paura e basta comme a mò

c’’o munno nun se sape pecchè tira

jenne ‘o cuntrario e comme avesse j’:

si overo ca sta pe j a fernì

o ce sta tiempo ancora pe campà.

Cert’è ca quanno nasce e quanno muore

è sempe nu dulore ca tu daie

a chi te sta vicine e te vo’ bbene,

te cure e te dà ammore e qualche pena.

Murimmo tutte quante lassa stà,

quann’è ‘o mumento 'un ce sta niente ‘a fa.

Stamme vicino nun avè paura

e sta sicura ca te voglio bbene

pure si ‘e vvote te faccio arraggià.

‘A vita è chesta pur’io aggia murì.

Tieneme astrette ‘e mane, nun m’’e lassà

quanno arrivo ‘o mumento e aggio partì.

Guarde che aria triste me juto a capità

propri’ ogge ca sento ‘o munno ‘ncuollo

e ‘a mano toia nun trova affianco a me.

Che sofferenza è ‘a vita, ‘a morte chi ‘o ssa !

Ostia lido,           19/09/2012      ore 08,00

Inserita nella raccolta "Suspire 'e miezojuorno"