Ma che me parle a ffà d’’o mese austo

Opera presente nel Museo Correale di Sorrento

Ma che me parle a ffà d’’o mese austo

si te ne parte e te ne vaie luntano

appena ll’aria cagna o se fà ‘e fuoco

e tuorne quanno vuò, quanne te piace

comme si ‘o munno nun ‘o canuscisso,

comme si ‘ccà io nun ce fosse cchiù

comme si fosse ‘o ll’urdemo d’’e fesse

e stu paese nun t’appartene cchiù.

Si nun riece a sta na vota ferma

e quanno tuorne t’arrienne sulo

chillu mumento ca me vuò parlà,

quanno me vuò cuntà chello ch’è fatto

che pozzo fa pe darte na ragione

pe restà na vota ‘nzieme a me ?

Fosse n’estate, sula na stagione

fore a sta luggetella tutt’’e duie.

Quante venette pe stà ‘nterra Surriento

me diciste ch’ire contenta che l’avevo fatto

e invece quanno parlo si distratta

e nun è ll’aria fresca ‘e stu scardino.

Chi sa sta freva ca tu siente ‘ncuollo

aAddò te l’è pigliata ?

E’ chi t’affatturata ca nun saccio.

Cuntamelle nu juorno

mentre cammenammo sott’o vraccio.

Guarda luntano e nun te piglià scuorno

comme si me dicisse ‘e fatte ‘e ll’ate,

‘e quanno t’arrubbave ‘a marmellata.

Quanno facive nu filone a scola

e nun sapive che parole dicere

pe te fa purdunà ‘a mmammeta

e ll’amice a cui tu dive ‘a colpa.


Na vota tanto fa ‘a perzona seria.
Si me vuò bbene a essere sincera
ci ha penzà tu
si no te lasse, nun ce vedimmo cchiù.

Gioacchino Ruocco


Ostia Lido                 23/06/2012




Inserita nella raccolta “Suspire ‘e miezojuorno”
pubblicata su questo blog giorno per giorno