'E vvote m'addumanne tu chi si...

'E vvote m'addumanne tu chi si

e tu.... tu me rispunne

chiedennemo io che voglio a te

c'ancora vaco attuorno a te cercà

e corre comme 'o viento

'a ccà e a llà

e dint''e mmorre

addò me pare 'e sentere na voce

ca me chiamma....

a tantu luntano

ca nun facci' 'a tiempo

ca quanno arrivo

te ne si ghjiuta a poco

ca sento ancora 'o sciato

dint'a ll'aria.

Attuorno a ttuorno

ll'aria s'arrecrea

comme si fosse

'o sciato d''a stagione

e io sent''o core

ca se cunnuleà

zucannese

'a caramella doce

'e ogne mumento

ca me sento 'ncuollo.

Me faccio cchiù muollo,

cchiù paciuso

e cchiù curiuso

cammino

speranno e te truvà

ancora 'e spalla

pe  t'acchiappà

comme a na surpresa

ca me porto appriesso

nun saccio cchiù 'a quanno

ll'atu juorno

turnaie a 'e ccose mie

e tu 'e ttoie

senza cchiù 'a noia 'e primma

ca me teneva 

comme a nu pullicino 

stritto mmane.

Gioacchino Ruocco

Ostia Lido    07.01.2020