TIPI : poesie napoletane

                        Ruocco Gioacchino

T i p i

Chi songo....?

Si me dice: - Chi si ? I’ nun ‘o saccio.

Me so’ appuggiato a nu vraccio

e cammino

e vaco annanze

speranno nu juorno ‘e me regnere ‘a panza,

e n’ato ‘e scrivere canzone.

Comme a n’ arille

senza na penzione

senza penzà a dimane

ca n’arte ‘e mmane nun  ‘a tengo

ma cu na passione

ca m’abbruci’ ‘o core.

Chi si ? ‘A gente vo’ sapé chi songo.

Ma ‘e guarde ‘nfaccia

e nun rispongo.

Nn’ ‘o saccio.

‘E vvote penzo ca so n’ato

e nun songo io.

‘E ccose cchiù luntane c’arricordo,

so cose ‘e ll’atu munno.

Allora sti penziere mie ‘e chi so’ ?

Si so’ dde mmie

me so’ venuto mmente

sfrennesianno forse inutilmente,

ll’at’anno, o ll’atu juorno ancora.

Cert’é ca io te guardo e penzo

ca me so’ perzo dint’a ll’uocchie tuoie,

c’‘o core è n’auciello, è nu lione

e appriesso appriesso

nu scemo ca fa fint’e niente.

So nu penziero, 'e vvote so’ pparole,

‘e vvote arraggia, ‘e vvote cacasotte.

E c’aggia fa si nun me piace ‘o munno?

I me ‘mbriache sulo quanno voglio,

cu ‘e parole ca ‘mbroglio

pe nun te dà ‘a vedè

ca nun capisco niente
o penzo ancora a te.

Si tu… tu si qualcosa,

i’ nun so niente

e p’’a famiglia mia nu male ‘e diente

ch’’e vote passa e 'e vvote fa ‘mpazzì.

Ostia Lido 28/08/2004

‘E zie ‘e Nicola.

Nicò,

ma che se contano

‘e zie toie ‘a sera

quanno se chiudeno dinto,

primme ‘e s’addurmì ?

Comme a tre frutte ‘e vrite

campeno ‘a jurnata,

una ‘int’a ll’uocchie ‘e n’ata.

Maie na parola

ch’è na lagnanza,

sempe cu ‘e mmane a ddà,

senza nu triemmo

senza na gioia

si nun si tu che guardano.

A me ca so n’amico

me guardeno e me vedono

sempe penzanno

si so na bbona lenza.

Dint’a credenza teneno

rusolio e mandarino

e dint’’e cascie

currede e curredine.

Tre vecchie mò…

tre sciure ‘e giuventù.

Dint’a puteca correno

sule pe servì ‘a ggente;

‘ngiro nun c’è nisciuno

ca parla malamente.

Ma ‘a sera che se conteno

‘nzerrate dint’’a casa ?

Chi ‘o ssa si ancora penzano

‘a giuventù passata
comme l'hanno passata ?

Ma dint’a ll’uocchie ‘e ognuna,

ca songo duie gravune

p’’o nniro ‘e che so fatte,

ancora ‘o core sbatte,

sbatte cchiù forte ‘a sera

quanno nisciune ‘e sente

quanno nisciuno ‘e vede

pe chillo ca passanno

nun s’è fermato maie

si no parlava ‘a ggente
ca nun ava parlà.

C.mare di Stabia                 12/1957

Mammà tene paura

Mammà tene paura

ca me mett'a fa ammore

cu na guagliona

ca nun tene manco na lira.

E appena me vede 'e parla cu Maria

me chiamma e me dice

ca tene che fà

e ave bisogno 'e na mana.

Stu fatto

é già na semmana

ca dura.

'O pate 'e Maria

nun tene ne arte e ne parte,

ma Maria tene n'arte

ca me fa scevulì.

E io

nun tengo ancora vint'anne!

Magare fra cinche o sei anne

ce putesse penzà.

Mò so cose ‘e creature

che stamme a penzà!

‘Ngiulinella

Ogne vota ca veco a ‘Ngiulinella

se n’è caduta l’asola e ‘a frummella

me manca allicche allicche e ‘a ficusecca

E tengo mille piecche e cchiù difette.

Ma tant’è bella, tanta è superchiosa

e quanta cchiù priezze io le faccio

tant’essa me risponde malamente

‘e cchiù ‘e na vota m’è girata ‘a faccia.

Ma si na sere ‘e chesta

’a ‘ncoccie dint’’o scuro

voglio vedè che fa

quanno cu ‘e spalle ‘o muro

se trove ‘e pietto a me.

‘O saccio ca ce tene,

c’’o sanghe dint’’e vvene l’abbruce.

Voglio vedè che dice,

voglio vedè che fa ?

Si va fuienno ancora

é proprio ora ca i’ cagno via,

ma dint’’e braccia astrenta

l’aggio tenuta già

e chhiù ‘e nù vaso ‘a diette

pe farla accuità.

Me vò,

ma comme a tutt’’e femmena

pur’essa se fa  ‘e cunte

ma ‘e juorne, ‘e juorne passano

e io c’’o contrabbasso

solfeggio ancora.

M’’a ggente ‘e int’’a stu vico

ca ‘int’a controra dorme

m’ha ditto ‘e fa duie passe

pe me svagà nu poco.

E allora me ne vaco

cantanno na canzone

speranno ca me sente

ca se n’addona.

Ostia Lido 03/04/2011 ore 14,30

'O magliaro.

'O 'ncuntraie 'ncopp''o treno

ca curreva a casa

pe vedé 'e figlie

primme ca le puteve

succedere

qualcosa malamente.

Fuieva d''a Germania.

'O vulevano arrestà

pecché 'a ggente diceva

ca sapeva sule ‘mbruglià.

Nun era overo.

No pecché m''o diceva.

Era sincero 'int'a ll'uocchie

e 'o gghianco era cchiù gghianco d''o mio

ca comme a Ddio ‘o stevo a sentì

Erano tre gghiuorne ca viaggiava

senza truvà arricietto.

E nu dolore ‘npietto

l’ere vute penzanno ‘e figlie.

Nun s''o mmeretavo

me diceve.

E io le credevo

pecchè 'int'a ll'uocchie

'o gghianco

era cchiù gghianco

e cchiù onesto d''o mio.

Da   'E pazzielle.     17/08/60

Don Ferdinando

Don Ferdinando

tene ‘a faccia tosta

‘O ssape c’’o fa apposta

e ‘o continua a fa.

‘Ncuiete ‘e criature

e cchiù ‘e nu pate l’è prumise

na bella mazziata

si ‘o figlio torna a casa

cu ‘e llacreme ‘int’’a luocchie.

Ch’’e fa ?

E dice doie papocchie

ca songo figlie ‘e ‘ndrocchie

che ’e vò adderezzà.

Ma intanto ‘e guaglinciellè

c’’a scusa d’’o fastidio

c’hanno pigliato ‘e mira

e ‘o stanno a secutà.

Ma  chi adderizzoisso

ancora 'un s’è truvato

cu tutte ‘e schiribizzi

c‘’a ggente sta a passà.

‘E tipe comme a isso

sule ‘int’’e votta votta

le può dà qualche cotta

pe nun ‘o fa parlà.

E sta facenno chesto

quase ‘a na vita sana

Nun è c’allonga ‘e mane

ma tene ‘a lengua longa

e te fa ‘ncuità

cu chello ca te dice

quanno tu passe a llà.

Ostia Lido 4 aprile 2011 ore 20,00

Vicienzo Pellecchia.

Vicienzo Pellecchia

senza na recchia é rimasto,

assecca pacchere 'e basta

ll'urdema rummasuglia 'e guapparia.

Mannagiia 'a vita mia

mannaggia sacripante

'o sfotteno tutte quante

'o sfottone pure 'e criature.

Addò sta cchiù 'o rispetto !

Pure 'o cchiù fesso

'o piglie pe pietto

e chille resta 'e gesso

nun fa na mossa

se palià.

Na vota 'o vedette 'e chiagnere,

ll'aveva vattuto 'a mugliera;

teneva na faccia nera

'a fa appaurà.

E' accusì ca fernette 'a carriera.
Mò assecca pacchere e basta.
Eppure senza na recchia é rimasto

Vicienzo Pellecchia.

Da       'E pazzielle.          27/10/60

Stella.

A quarant'anne

nun chiagne e nun strille.

Se tire arrete 'e capille

e cu dduie uocchie lucete,

sempe matenera, sbracciata

corre pe 'ncopp'a luggiata

spannenno ‘a culata

e ogne tanto redenno

pe fa vedé

ca nun é malata

e cu na meza vucella

canta na canzuncella.

Sempe tarde a sera,

no p'aspettà qualcuno

o per parlà cu 'a luna,

ormaie stu tiempo é passato,

nun tene cchiù voglia 'e sunnà;

fa tarde p'arrepezzà,

pe taglià, p'accuncià.

E  'a luce soia

se stuta p’urdema

dint'a stu vico

comme a na stella.

Da Frunnelle pazzarelle   C.mare di Stabia                   11/12/1957 

Pascale Pezza.

Quanno Pascale Pezza more

ll'anema soia addò va ?

Va buo', è overo

fino a che more

pur'isso pò cagnà.

'A ggente

cagna dint'a nu mumento.

E n'ommo malamente

pò sempe cagnà sciorta

comme a cagnene ll'ate

cagnanne via,

cagnanne 'e cunnutate ?

Mò, tiramme a campà,

pecché fino a che more

ce vo tiempo

e 'o tiempo cagne 'e ccose

e 'a ggente nun ce penza cchiù

a tutte 'e fetenzie

ca va facenne.

Già mò

'e vvote s'appenna 'a nu chiuvo

e 'o truove ca penza e pò penza

e cuntinua a penzà

cu ll'occhie fisse dintt’o scuro.

Qualcuno dice ca nun é cchiù isso

e 'o passe 'nnante

comme si fosse nisciuno.

Che me ne fotte

Ha ditto qualcheduno.

Chesta è ‘a fine che fanno sti guappe.

Da       Tipi                        Cmare 1961

'O scupatore.

'O ministro tal dei tali

me facette piglià 'o posto.

E o te mine p''a fenesta

o te mengne sta menesta

accussì fuie p me.

Nun tenenno arte o parte,

nun sapenno ca fa niente

me dicette: - Tu che vuò ?

Ce sta chesto e t'accuntiente.

M'accuntento, e sto a scupà.

Senza ce penzà doie vote.

E accummiciaie a pavà,

'e diebbete già fatte

e chille ca facevo;

mannave 'e figlie a scola

e m'accedeve 'e fatiche

comme a tutte quante ll'ate.

Ma nu juorno nu signore

ca teneva 'a dì qualcosa

le dicette: - Siente!

Visto ca tu si nu scupatore …

Cerca ‘e sta ‘o posto tuoie

comme un grande disonore

Comme si a munnezza 'nmiez''e vie

invece d''a levà ci 'a mettesse io.

E sto scupanno tanta fetenzia

ca chistu nomme

invece me fa tant'onore.

Dal blocchetto                  Maschere